من باب العلم بالشيء وعشان نكون على نور من الأول
خبراء التغذية بيقولوا لك: قطعة الكحك الصغيرة فيها تقريبا 200 سعر حراري وممكن تصل إلى 400 سعر لو متغذية شوية بالسمن والسكر والملبن
قطعة الغُريبة تتراوح بين ال 150 إلى 300 سعر ولو بالزبدة وحجمها حلو كدة ممكن توصل ل 430 سعر 🤔🤔
قطعة البيتي فور فيها تقريبا من 90 ل 180 سعر حراري حسب كمية الشيكولاتة أو المربى اللي عليها 😁
أما قطعة البسكويت فيادوب بتلعب بين ال 75 ل 90 سعر تقريبا عشان مسكينة مافيهاش حشو ولا إضافات يا عيني
احتياجك اليومي لو حضرتك ذكر بالغ متوسط الحجم والسن والمجهود بيكون في حدود 2000 سعر يوميا ولو حضرتِك أنثى فالرقم ده هيقل شوية طبعا
وده بالمناسبة مش للي عاوز يخس .. فقط يريد أن يثبت وزنه 🙂
اللي عاوز يخس له كلام تاني خالص 😠
يعني ببساطة كحكتين وغُريبتين وبسكوتة وبتيفورة = ممكن بيهم تكون أخذت كل احتياجك اليومي تقريبا وأي حاجة تانية ستمر من فمك إلى معدتك معناها بوضوح = دهون مخزنة وزيادة في الوزن وفي حجم الكرش واحنا في حظر يا صاحبي والعملية مش ناقصة 🙄🙄
طيب أعمل إيه؟
ما أفرحش بالعيد يعني 😡
يا عم افرح طبعا وكل واتبسط
بس بالمعقول 😊😊
يعني لو عاوز نصيحتي = ذق
بالعامية = دوق
بلاش تمسك علبة الكحك تأتي عليها كلها عشان مجرد حاسس بالملل شوية🙄
خدلك كحكاية وبتيفوراية وصدقني الطعم بتاع واحدة هو نفس طعم عشرة أو عشرين قطعة 😂
كلهم يا صاحبي عجينة واحدة فمش فارقة الكمية
وعموما أديني قلتلك أهو وعملت اللي عليا وانت حر طبعا 😉
بس ما ترجعش تزعل لما تبدأ رؤيتك لقدميك تقل شيئا فشيئا بسبب هذا الكرش الذي يتمدد بالكحك والبيتيفور وينكمش بالرياضة والأكل الصحي 😊
وكل سنة وانتو طيبين ويجعله عامر 🙂
إرسال تعليق